दो बूँद जिनगी के............

श्रीमती सपना निगम

पल्स पोलियो अभियान - जनहित में जारी

दो   बूँद जिनगी  के  , बन जाहे   वरदान

बात  मोर  सुन ले  , गाँठ बाँध ले मितान.

अपन  नोनी - बाबू  के  , जिनगी  सँवारव

पोलियो  अभिशाप हरे  ,  उन ला उबारव

जन - हित के  खातिर , चलत हे अभियान

बात  मोर  सुन ले  , गाँठ बाँध ले मितान.

तुरते  जनम   धरे रहे ,  वहू ला पियावव

नान नान लइका ला, कोरा मा धर के आवव

पाँच  साल तक लइका के करे रहिहौ ध्यान

बात  मोर  सुन ले  , गाँठ बाँध ले मितान.

स्वस्थ   रही  लइका , सँवर  जाही  पीढ़ी

देश  के  बुलंदी  के   बन   जाही  सीढ़ी

पोलियो - उन्मूलन बर , चलत हे अभियान

बात  मोर  सुन ले  , गाँठ बाँध ले मितान.

दो   बूँद जिनगी  के  , बन जाहे   वरदान

बात  मोर  सुन ले  , गाँठ बाँध ले मितान.

श्रीमती सपना निगम

आदित्य नगर, दुर्ग

छत्तीसगढ़

 

[शब्दार्थ : बन जाहे = बन जाएगा, मितान = मित्र, उन ला = उन्हें,  नोनी-बाबू = बेटी-बेटा, वहू = उन्हें भी, पियावव = पिलाइये, नान नान लइका = नन्हें नन्हें बच्चे, कोरा मा = गोद में,मोर = मेरी]