अरुण कुमार निगम (हिंदी कवितायेँ)

"छत्तीसगढ़ी भाखा महतारी - आरती गीत"

गीतकार - अरुण कुमार निगम, 

छत्तीसगढ़ी भाखा महतारी, पइयाँ लागँव तोर

पइयाँ लागँव तोर ओ दाई, पइयाँ लागँव तोर 

तहीं आस अस्मिता हमर अउ, तहीं आस पहिचान

आखर अरथ सबद के दे दे, तँय  मोला वरदान।।

खोर गली मा छत्तीसगढ़ के, महिमा गावँव तोर…

पइयाँ लागँव तोर ओ दाई पइयाँ लागँव तोर 

एक हाथ हे हँसिया बाली, दूसर दे वरदान

तीसर हाथ धरे हे पोथी, चौथा देवै ज्ञान।।

पढ़े लिखे बोले बर दाई, चरन पखारँव तोर...

पइयाँ लागँव तोर ओ दाई पइयाँ लागँव तोर

करमा सुआ ददरिया पंथी, गौरा-गौरी फाग

पंडवानी भरथरी तोर बिनकब, कइसे पावै राग।।

छमछम नाचँव राउत नाचा, दोहा पारँव तोर...

पइयाँ लागँव तोर ओ दाई पइयाँ लागँव तोर

कभू दानलीला रचवाये, कभू सियानी गोठ

मस्तुरिया के अन्तस बइठे, करे गीत ला पोठ।।

महूँ रात-दिन सेवा करहूँ, बेटा आवँव तोर

पइयाँ लागँव तोर ओ दाई पइयाँ लागँव तोर

अरुण कुमार निगम

आदित्य नगर, दुर्ग

छत्तीसगढ़